නිමල් මොනරාගල බස් රථයට නැගුණේ ඔක්කම්පිටියට යෑමටය. නිමල්ගේ සොහොයුරා ඔක්කම්පිටියේ නි‍ෙවසක නතරවී මැණික් ගරමින් සිටියේය. බස් රථය බෙරගල පසු වී ටික දුරක් යනවිට ලෙඩ දීමට පටන් ගත්තේය. රියදුරු මහතා “ඩීසල් බ්ලොක් එකක්” යැයි කියමින් වරින් වර සුළු ප්‍රතිකාර කරමින් ඇන්ජිම පණ ගන්වා ටික දුරක් ගියද නැවත පණ ගැන්වීමට නොහැකි වන සේ බස්රිය ක්‍රියා විරහිත විය.
බසයේ සිටි සමහරු ඉඳහිට පැමිණි ලොරි රථවල නැඟී ගියහ. නිමල් කළ හැකි දෙයක් නොමැති බැවින් අසල තිබු කුඩා තේ කඩයට ගොඩ වූයේ ගමනට වාහනයක් එන තෙක්ය. නිමල් තේ එකක් බොන ගමන් ඔහු‍ෙග් වයසේ තරුණයෙකු සමඟ කතාවට වැටුණේය. ඔහු ද නිමල් මෙන් අපොස විභාගය ගෙන රැකියාවක් බලාපොරොත්තුවෙන් සිටි අයෙකි. දෙදෙනා කතාබහෙන් ගජ මිතුරෝ බවට පත්විය. මිතුරා නිමල්ට ඔහුගේ නි‍ෙවසට යෑමට ආරාධනා කළේය. නිමල් ද ගමන පසෙකලා අලුත් මිතුරාගේ නිවෙසට යෑමට කැමති විය.
ප්‍රධාන පාරේ සිට සැතපුමක් පමණ පටු මඟක් ඔස්සේ ගඟ කිට්ටුවට ම ගිය නිමල් වෙල් යායක් අසල පිහිටි නිවෙසකට ගොඩ විය. මනහර පරිසරයක පිහිටි නිවෙස නිමල්ගේ සිත් ගත්තේය. නිමල්ගේ දෙමාපියෝ කරුණාවන්ත අය වූහ. නිමල් සමඟ ගමරට තොරතුරු කතා කිරීමේදී නිමල් මැණික් ගැරීමට යන බව අසා ඔවුහු තමන් ළඟ පරිස්සම් කරගෙන තිබූ ගලක් පෙන්වූහ.
මිතුරාගේ පියා කුඹුරේ ඇළ ගොඩ දමනවිට මේ ගල හමුවූ බවත් එය අනෙක් ගල්වලට වඩා පැහැපත් බව හා වෙනසක් තිබෙන නිසා පරිස්සම් කළ බවත් කීවේය. එය වෛරෝඩියක් බව නිමල් හඳුනා ගත්තේය. ගල ඒ අත මේ අතර පෙරළා බලමින් “මේක මැණිකක් නෙවේ. මැණික් තියන ඉල්ලම්වල මේව තියනව. මේක ඒ තරම් වටින්නේ නැහැ. රත්නපුරේ අරන් ගියොත් රුපියල් පනහකට විතර විකුණන්න පුළුවන් වේවි.” කියා බොරුවක් කීවේ කපටිකමක් සිත යට සඟවා ගෙනය.
“හැබැයි මේ ඉඩමෙ මැණික් තිබේවි. අපි පතලක් දෙකක් කපල බලමු.” නිමල් කීවේ මිතුරා දෙස බලමින්ය. ඔහු ද පතලක් කැපීමට කැමති වූ නිසා ගමේ ගොස් මැණික් ගරන වට්ටියකුත් රැගෙන එන බවට පොරොන්දු විය.
එදින මිතුරාගේ නිවෙසේ නතර වූ නිමල් ගමට ඒමට පිටත් වූයේ තව දින දෙක තුනකින් මිතුරාගේ ඉඩමේ ගැරීමට එන බව පවසමිනි. ඒ අතරම මිතුරාගේ පියා අත තිබූ වෛරොඩිය ද ගෙන ආවේ එය විකුණා මුදල් ගෙන දෙන බවට පොරොන්දු වෙමිනි. ගමට පැමිණි නිමල් පසුවදාම වෛරොඩිය රුපියල් විසිපන්දාහකට අලෙවි කර මුදල් බැංකුවේ තැන්පත් කළේය.
දින තුනකට පසු නිමල් මිතුරාගේ නිවෙසට ගියේ මිතුරාටත් දෙමාපියන්ටත්, මිතුරාගේ නංගීටත් තෑගි බෝග ද අරගෙනය. රුපියල් දෙසීයකට ගල්කෑල්ල අලෙවි කළ බව කියූ නිමල්, මිතුරාගේ පියාට රුපියල් දෙසීයක් දුන්නේය. සතියක් පමණ මිතුරාත් සමඟ මැණික් සෙවූ නිමල් නිල් මැණිකක් ගැරුවේය. එය ඇහැලියගොඩ විත් අලෙවි කළේ මැණික් මුදලාලිත් සමඟ ඇතිකරගත් රහස් ගිවිසුමක් මත නිමල්ට වැඩි මුදලක් ලැබෙන ලෙසටය. නිමල් දිගටම මැණික් ගැරුවේය. මිතුරාගේ නැගණිය විවාහ කර ගත් නිමල් ඔහුගේ ගමේ නිවෙසක් ඉදිකළේය. අක්කර පහක රබර් ඉඩමක් ද ගත්තේය.
අහම්බයෙන් හමුවූ මිතුරෙකු නිසා ධනවතෙකු වී සැපවත් ජීවිතයක් ගත කරන නිමල් අද රජයේ වැදගත් රැකියාවක් කරන දරුවන් දෙදෙනෙකුගේ පියෙකුවී හැට හය වන වියේ පසු වන්නෙකි. එවගේම නොසිතූ ලෙස මිතුරෙකු වී පසුව මස්සිනා බවට පත්වී නිමල් මතු කර දුන් මැණික් ඉල්ලම නිසා මිතුරා උක් මෝල් හිමියෙකු මෙන් ම ධනවත් ව්‍යාපාරිකයෙකු ද වී සාර්ථක ජීවිතයක් ගෙවයි.
