අනවසරයෙන් මැණික් ගරන්නෝ සැම මොහොතකම විමසිල්ලෙන් යුතුව සිටින්නෝය. ඒ කුමන අවස්ථාවක හෝ පොලිස් වැටලීමක් වීමට ඉඩ ඇති බැවිනි. ඈතින් හූ හඬක් ඇහුණත්, කෙනෙකු ඉක්මන් ගමනින් යනවා. දුටුවන් ඔවුහු බිය වෙති. මේ එවැනි සුළු අඩුපාඩුවක් නිසා සිදු වු අකරතැබ්බයකි.
අපේ ගමට අල්ලපු ගමේ නඩයක් ඇලහැර ගියේ යහමින් මැණික් ලැබෙන ඉල්ලමක වැඩ කිරීමටය. ඔවුහු ද අනෙක් නඩ හා එකතුව පතලක් කැපූහ. එම පතල් පොළෙහි එක යාවට පතල් තිහ හතළිහක් විය. පිරිස දෙසීයකට ආසන්නව සිටියහ. පතලේ වැඩ කරන අය අතරින් කෙනෙකු දහවල් ආහාරය සකස් කිරීමට වාඩියට යෑම සිරිතකි. නැතිනම් උදේම දහවලටත් සමඟම ආහාර සකස් කරති. අපේ පතල් නඩයෙන් කෙනෙකු වාඩියට යැව්වේ දහවල් කෑම සකස් කිරීමටය. හැබැයි ඔහු ඊට පෙර වාඩියේ ආහාර සකස් කර නොසිටි අයෙකි.
නිමල් දිය පාරට බැස අත පය සෝදාගෙන වාඩියට ගියේය. කෑම ඉවීමේ හැකියාව තිබුණ ඔහු බත ළිප තබා වෑන්ජනයක් සකස් කිරීමට සූදානම් විය. පොල් සොයා ගැනීමට වාඩිය සෑම තැනම බැලුව ද පේන තැනක පොල් නොතිබුණි. ඇලහැර අධික වියළි පළාතක් බැවින් පොල් පිපිරීමට ඉඩ ඇති නිසා කල් තබා ගැනීමට අපහසුය. එනිසා පොළවේ වළ දමා හෝ සෙවණක තබා පොල් ආරක්ෂා කර ගැනීම සිරිතය. මෙම නඩය ද පොල් වාඩිය පිටුපස සඟවා තිබුණ ද නිමල් ඒ බව නොදත්තේය. එනිසා පොල් කොහේදැයි දැන ගැනීමට පතලට ගොස් අනෙක් අයගෙන් දැන ගත යුතුව තිබුණි.
නිමල් පතල ළඟට දිව්වේය. කැලය මැදින් ගොස් පතලය ළඟට දිව ගිය නිමල් හති දමමින් පොල් කොහේදැයි විමසුවේය. නිමල් උප්පත්තියෙන් ම ගොත ගසන්නෙකි. ඒ බව පතල් නඩය දනී. එනිසා ඔහු හති දමමින් පොල් ගැන ඇසීමට පොඃ පොඃ පොඃ ගාන්නට විය. මේ කතාව අසා සිටි අහල පහල පතල්වල අය දුවන්නට පටන් ගත්තේ නිමල් පොලීසියෙන් එන බව කියනවායැයි සිතමිනි. නිමල්ගේ කතා විලාසය දන්නා පතල් නඩය කලබල නොවුණද අසල පතල්වල සිටි පිරිස උදලු, යකඩ, වට්ටි, කූඩ ඔසවාගෙන කැලෑව දෙසට දුවන්න වූහ. සෙසු පතල් නඩද බෙලිගෙඩියට බිය වී හාවා දිව්වා මෙන් සී සී කඩ දුවන්නට පටන් ගති.
මේ කලබලය අස්සේම නිමල් පොඃ පොඃ පොල් කොහේදැයි පතල් නඩයෙන් විමසුවේය. කාරණය තේරුම් ගත් පතල් නඩයේ ගුරා වට පිට බැලුවේ දුවන පිරිසට දුවන්නට එපා යැයී කීමටය. ඒ වන විටත් පතල් පොළ පාළුවට ගොසිනි. පොල් තිබෙන තැන කියා නිමල් වාඩියට යැවූ පිරිස පතලේ වැඩ කළේ සිනාසෙමිනි. පැය බාගයකට පමණ පසු කලබලයක් නැති බව වැටහුණු සෙසු පතල් බාස්ලා එකා දෙන්නා පතල්වලට ආවෝය. නැවත සුපුරුදු සේ පතල් වැඩ කළේ නිමල්ගේ කතාවට සියලු දෙනා බඩ අල්ලාගෙන සිනාසෙමිනි.
